“سياسة التسعير”

من أصعب وأهم مراحل أى منتج أو مشروع هى سياسة التسعير والتى فى بعض الأحيان قد تحدد نجاح أو فشل هذا المنتج أو هذه الخدمة .

وعلشان نفهم كويس إزاى نسعر منتج لازم ناخد بالنا إن كتير من الناس بتحدد سعر المنتج من سعر التكلفة يعنى مثلًا يقول أنا المنتج ده بيكلفنى 5 ج هاكسب 20% منه يبقى هابيعه ب 6 ج وده طبعًا كلام غلط لأسباب كتير منها إن دى التكلفة المباشرة بس يعنى ممكن تخسر لو بعته بالسعر ده ومنها إن ممكن مايتبعشى لو سعرته ب6 ج لأن زيه بيتباع فى السوق ب 5 ونصف وعلشان كده لازم نفهم قبل ما نسعر بعض العوامل الأساسية للتسعير .

أولًا: التكلفة الحقيقية للمنتج .

ثانيًا: الشريحة المستهدفة .

ثالثًا: الصورة الذهنية للمنتج لدى العميل.

رابعًا: المنافسين .

أولا التكلفة الحقيقية للمنتج :-

كتير من الناس مابيعرفش التكلفة الحقيقية للمنتج وده بيخليه بيبقى فاهم إنه شغال كويس وبيكسب وبعد كده يكتشف آخر السنة إنه خسران وكتير من الناس بتكتشف كده وهي بتقفل المشروع للأسف .

وعلشان نعرف التكلفة الحقيقية لازم نقسم التكلفة لأنواع غالبًا بتبقى موجودة فى كل المشاريع وفيه مشاريع بتحتاج نحط أنواع أخرى ….. تعالوا نقسم التكلفة لتكلفة مباشرة وتكلفة غير مباشرة .

التكلفة المباشرة هى تكلفة الخامات اللى أنا محتاجها علشان أنتج وحدة من المنتج يعنى لو أنا حلوانى يبقي بشوف لو هاعمل * تورتة هتاخد دقيق وسكر وسمنة وغاز بكام لكل تورتاية لوحدها فمثلًا ممكن ألاقى إن كيلو الدقيق بيعمل 5 تورتات يبقى التورتاية بتكلف دقيق بس كذا وبتحتاج 1 كيلو سكر وهكذا …. فى الآخر بتطلع مثلًا التكلفه 20 ج .

طيب التكلفة المباشرة بتطلع 20 ج يعنى لو بعت ب25 ج يبقى أنا بكسب 20% ؟؟

طبعًا غلط لأن فيه بقى تكلفة غير مباشرة واللى هى بتتقسم لحاجات كتير زى :-

تكلفة تشغيل :- يعنى إيجار المحل ورواتب الموظفين والكهرباء والمياه والتسويق …. إلخ ودى مثلًا هافترض إنها 10 آلاف ج .

تكلفة تمويل :- ودى بتطلع لرأس مال المشروع حتى لو الفلوس دى بتاعتى يعنى لو حاطط 100 ألف ج يبقى تكلفة التمويل مثلًا 10 آلاف ج فى السنة (لو كنت حطيتهم فى البنك) ولو واخد قرض لاقدر الله ب18% فائدة مثلًا يبقى تكلفة التمويل بتاعتك 18 ألف ج فى السنة يعنى ألف وخمسمائة ج شهريًا .

تكلفة الإدارة :- وهى قيمة مرتب حضرتك (يعنى لو انت اشتغلت بره هتاخد كام ؟) وفيه كتير من الناس مبيحطش دى بالذات وبيسحب كل ما يتزنق وخلاص وممكن في بعض الأحيان ياخد أكتر من المكسب وبيوقع المشروع .

وهانفترض إنه فى الحالة دى 4500 ج شهريًا .

تكلفة الإهلاك :- ودى برضه ناس كتير مبتعملشى حسابها ودى معناها المعدات والتجهيزات اللى إنت اشتريتها بتقسم سعرها على 5 سنين مثلًا (فيه حاجات أقل من كده زى أجهزة الكمبيوتر وفيه حاجات أكتر من كده) وتطلع تكلفة شهرية وفى الحالة دى لو المعدات والتجهيزات وفيها مصاريف السجل التجارى والبطاقة الضريبية (تكاليف بداية المشروع(.

كل ده لو اتكلف مثلا 60 ألف ج يبقى تكلفته شهريا ألف ج .(60 ألف ÷ 60 شهر (5 سنوات إهلاك))

بعد كل ده ممكن نلاقى التكلفة غير المباشرة 17000 ج شهريًا لو أنا بنتج ألف تورتاية هاتبقى التكلفة المباشرة للواحدة 20 ج والتكلفه الغير مباشرة 17 ج .

طيب هو أنا هابيع 1000 تورتاية إزاى أصلًا ؟؟ لأ ده سؤال هانجاوبه بعدين إحنا هنا بندى مثال رقمى علشان نقرب موضوع التكلفة المباشرة والغير مباشرة .

طيب أنا كده عرفت إن تكلفة التورتاية 37 ج يبقى هابيعها بكام ب 40 ج مثلًا ولا ب70 ج ولا ب 150 ج ؟

لأ ده سؤال يطول شرحه ولازم نجاوبه فى بوست تانى المهم إنك تبقى عارف إنك لو بعت بأقل من 37 ج هاتخسر وده فى حالة إنك بتبيع 1000 فى الشهر لأنك لو بعت 900 بس هاتبقى تكلفتك 38.9 ج ولو بعت 800 تبقى تكلفتك 41.25 ج ودى معادلة بسيطة علي الإكسل يفضل إنك تتعلم تعملها كرجل أعمال أو تخللى حد يعملها لك.

  • * التورتة أو التورتاية هى قالب الكعك باللهجة المصرية

  • – الكاتب مجهول

Advertisements

About Amr Badran

An Egyptian Business Consultant and Corporate Trainer since 1997. I've trained on Management, Leadership and Soft Skills to thousands of people from many nationalities, backgrounds and professions in more than 10 countries across the Middle and Far East. Holder of an MBA and a Candidate for Doctorate in Business. Find more about my Management and Personal Skills Courses at AmrBadran.com and feel free contacting me at Amr@AmrBadran.com
This entry was posted in معلومات عامة, الإدارة, العمل. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s